ᲑᲐᲮᲛᲐᲠᲝᲡ ᲗᲐᲡᲘ 2026

სოკარის მხარდაჭერით, 19 აგვისტოს კურორტ ბახმაროში ტრადიციული დოღი „ბახმაროს თასი 2026“ გაიმართა. ღონისძიებამ საქართველოს სხვადასხვა რეგიონიდან მხედრები გააერთიანა და ბახმაროს საზაფხულო სეზონის ერთ-ერთ გამორჩეულ სანახაობად იქცა.

ბახმაროში დოღის ტრადიცია გასული საუკუნის 30-იანი წლებიდან იღებს სათავეს და ყოველწლიურად, ფერისცვალების დღესასწაულზე, კურორტის ისტორიულ და კულტურულ მნიშვნელობას კიდევ ერთხელ წარმოაჩენს. „ბახმაროს თასი 2026“-ის ფარგლებში რამდენიმე გარბენი გაიმართა, მათ შორის „ნაბეღლავის თასი“, „გურიის თასი“, „გმირების თასი“ და მთავარი გარბენი - „ბახმაროს თასი“ მარულა, 4 800-მეტრიან დისტანციაზე.

ღონისძიებამ გააერთიანა სპორტული სანახაობა, ეროვნული ტრადიცია, ადგილობრივი კულტურა და ბახმაროს უნიკალური გარემო. სოკარისთვის მსგავსი ინიციატივების მხარდაჭერა ქართული ტრადიციების, რეგიონული ღონისძიებებისა და ეროვნული მემკვიდრეობის პოპულარიზაციის ხელშეწყობას უკავშირდება.