ENERGO HACK - ᲘᲜᲝᲕᲐᲪᲘᲣᲠᲘ ᲘᲓᲔᲔᲑᲘ ᲔᲜᲔᲠᲒᲔᲢᲘᲙᲘᲡ ᲡᲔᲥᲢᲝᲠᲘᲡᲗᲕᲘᲡ

საქართველოს ინოვაციების და ტექნოლოგიების სააგენტოს ორგანიზებით, Energo Hack გაიმართა, რომელიც ენერგეტიკის სექტორში არსებული გამოწვევების ინოვაციურ და ტექნოლოგიურ გადაწყვეტებს დაეთმო. ჰაკათონში მონაწილეობა 18-მა გუნდმა და 60-მდე მონაწილემ მიიღო. გუნდებმა რეალურ გამოწვევებზე იმუშავეს და როგორც Hardware, ისე Software მიმართულებით საკუთარი იდეები და პროტოტიპები შექმნეს.

ჰაკათონის პარტნიორმა სოკარ ჯორჯია პეტროლეუმმა საკუთარი რჩეული გუნდი გამოავლინა. სოკარის რჩეული გახდა MyEnergy - საქართველოს ენერგეტიკის ინტერაქტიული სიმულატორი, რომელიც ენერგეტიკულ გადაწყვეტილებებს თამაშის ფორმატში აცნობს მომხმარებელს. მობილურზე მორგებული ბრაუზერული თამაში მომხმარებელს ენერგო-მეწარმის როლში აყენებს და აძლევს შესაძლებლობას, საქართველოს რეგიონებში მზის, ქარისა და ჰიდროსადგურების განვითარებით ქვეყნის ენერგომომარაგებაზე იზრუნოს.

MyEnergy რეალურ ქართულ ენერგოგამოწვევებზეა აგებული და ისეთ თემებს აერთიანებს, როგორებიცაა ენერგოდეფიციტი, იმპორტირებულ რესურსებზე დამოკიდებულება, საზოგადოებრივი ნდობა და ენერგოწიგნიერება. პროექტი მომხმარებელს ინტერაქციულ გარემოში აჩვენებს, როგორ შეიძლება აისახოს თითოეული გადაწყვეტილება ენერგოსისტემაზე, ეკონომიკურ შედეგებსა და საზოგადოებრივ განწყობაზე.

სოკარ ჯორჯია პეტროლეუმისთვის ახალგაზრდების მხარდაჭერა სოციალური პასუხისმგებლობის ერთ-ერთი პრიორიტეტული მიმართულებაა. კომპანია აგრძელებს ისეთი ინიციატივების ხელშეწყობას, რომლებიც ახალგაზრდებს, ინოვატორებსა და სტარტაპებს რეალურ გამოწვევებზე მუშაობისა და პრაქტიკული გადაწყვეტების შექმნის შესაძლებლობას აძლევს.